فضفضة ... عن أهل قاع الريف الحزين

زحمة يا دنيا زحمة
زحمة وتاهوا الحبايب
زحمة ولاعدش رحمة
مولد وصاحبه غايب

زحمة فى كل حتة والمترو بقى بجنيه والبنزين غلى 30 قرش ولبنان بتضرب وحزب الله بيضرب أسرائيل كل ده فى 3 شهور أنا مرمى فيهم هناك معرفش اى حاجة الا طشاش
مكتئب طبعاً وشايف الحياة بلون البيادة ... أسود
قاعد بجيبها يمين وشمال عشان الاقى أمل فى ضياع 3 سنين أو للدقه 28 شهر من عمرى وكالعادة مفيش فايدة
أحاول اقنع نفسى ان الحياة هتمشى عادى كمان 28 شهر - حوالى 2 سنة و 4 شهور - بعد كده يطلع العقل زى الخازوق ويسئل يعنى ايه عادى؟؟
يعنى بعد 2 سنة و4 شهر هتطلع تلاقى الشغل والشقة والعروسة وكل حاجة جاهزة؟
وعلى طول يرد الجانب المنظم المنطقى ويقول : مفيش فايدة

حاجات كتيرة ضاعت فى ال3 شهور اللى فاتت
ناس سافرت مشفتهمش وناس أنتهوا معرفش عنهم حاجة وبرضه مشفتهمش قبا ما ينتهوا
حاجات كتيرة ماتت من جوه - خلى بالك من جوه دية عشان دية بتعبر فى مصطلاحاتى عن الجانب الإنسانى منى - لامبالاه كبيرة ظهرت فى تعاملاتى العادية طبعاً مش هنتكلم عن منظومة الوطن والكلام ده عشان أنا بقالى 3 شهور كل ما أكتب حاجة لازم أقول فيها أنا لا أؤمن بالوطن حتى إن كانت الحاجة ليها أو ملهاش علاقة بالوطن

الجانب المهنى من الحاجات الكتيرة اللى ناقحة عليا كل المشاريع باظت طبعاً فيه ناس من اللى شغال معاهم لسه نايمين فى مية البطيخ وبيقولوا مستنينك كمان 3 سنين أو الناس اللى من قاع الريف الحزين اللى بيقولوا انت زى ما أنت مستواك زى ما هو .... هنعملوهم ايه يعنى ؟ من قاع الريف الحزين

نتكلم عن نوع تانى من قطاع قاع الريف الحزين الناس اللى مش بتلاقى حد يكلموه ودول كانوا فى قديم الزمن - من 3 شهور يعنى - يصطادوا العبد لالله على قهوة شمبليون ويبتدوا يكلوا فى ودانه عن مشاكلهم النفسية واللى بتدور فى نطاقين
1 - مرتباتهم قليلة رغم أنهم شغالين ميت فل وعشرة
2 - مشاكل مع الإنسان اللى مرتبطين بيه - زوجات وأمهات الغد - وأزاى يحلوا هذه المشاكل
وطبعاً دلوقت ما بيصدقوا يلاقوا العبد لالله نازل أجازة عشان يسلموا عليه - ده اللى هما بيقولوه طبعاً - عشان يسلموا وبالهناء والشفاء ياكلوا فى ودانى وفعلاً ياكلوا فى نفس المواضيع مع العلم أنى بقبض دلوقت 75 جنيه ومش مرتبط ومينفعش لمدة 3 سنين أنى أرتبط ... وأقعد اسمع واسمع واشيل وأكتئب والأجازة خلصت ومعرفتش أفضفض عشان عندهم شغل تانى يوم
فلقيت الحل انى أستغل المدونة عشان أفضفض وده الأذكياء هيلاحظوا انى بعمله دلوقت بدقة متناهية مع من هم ليسوا من قاع الريف الحزين وهو ببساطة منطقة فى جمهورية مصر العربية وأكيد فى الريف وأكيد أهلها من الحزانى على الأرض
أنا مكتئب حاولت أسافر الأسكندرية فى أجازة من الأجازات الصغيرة وندمت جداً انى رحت هناك وده عشان الناس اللى قعدت معاهم لقيتهم أتحولوا إلى موظفين وده كابوس قديم عندى لقيته بجد فجأة
أكتشفت برده أن اللى يجيب 96.4% ميدخلش الكلية اللى عايزها بس كالعادة لا مبالاة ... الخبر مجرد شدنى
نتكلم بطريقة جدية كئيبة
أنا مش زى ما كنت حاجات كتير أتشوهت ومبقاش عندى أهتمام بالحياة
فقدت القدرة على الأبداع حاسس أن الدماغ جالها ضمور أو فضيت مقارنة بالأول
مش عارف العب مزيكا زى ما كنت فى الأول كل بروفة فى الاجازة بروح وأنا متضايق عشان حاسس أنى مش عارف أعمل حاجة ده غير الأحساس بالذنب أتجاه الناس اللى بلعب معاهم
الجلوس على القهوة بقى كئيب بقيت منعزل أكتر عن الناس ومش لاقى حاجة كويسة أفكر أو أكتب فيها كل اللى فى بالى 3 سنين أونطة طاروا فى الهوا وبعدهم ولا هعرف أسافر أو أشتغل أو أتجوز ... بس أنا مش عايز ولاد
- يعنى ايه؟
- يعنى مش عايز أخلف أنا شايف ان اللى يخلف فى العصر ده بيظلم عياله
- قلتلى ... طيب ربنا يسهلك
طبعاً أتخطبت بعديها يمكن تكون أتجوزت دلوقت
رغم كل ده وكل اللى أنا حاسس بيه - اللى ممكن يكون غيرى شايفه حاجة بسيطة وده حقه طبعاً - ربنا يرزقنى ببتوع قاع الريف الحزين
ولما أصرخ وأقول حرام يا عم كفاية نمر وبلاوى مايردش وأفضل لوحدى باصص للسما السوده - عشان بليل - وأقول مفيش فايدة قبل ما أدخل أنام