حـــــــــــــــــــــــرام كــــفــــــــايـــــــــة

لن تجد هنا سوى النقد .... معنديش حلول .... و لازم أتكلم عشان زهقت

أنا شخص عايش فى البلد دية
مش مهم دينى ايه .... أو نفسى أن الناس تتعامل على هذا الأساس
أنا شخص ماليش فى النقض السياسى بطريقة علمية
لكن بتعامل مع البشر على أساس بسيط اسمه الحرية
أنت واخد حريتك يبقى أنت فى مجتمع حلو ... مش واخد حريتك يبقى مجتمع وحش
و لو مش واخد حريتك مش هرمى اللوم على الكرسى إلا لما اتأكد ان مش أنت اللى بعتها ببلاش

أنا واحد من الناس اللى التلت الأول من يومهم بيعيشوا فى مجتمع منغلق
جاهل
يطبق بطريقة مباشرة : الدين أفيون الشعوب
و اللى مش عجبه ... يرزع راسه فى الحيطة
عشان كده عندى صداع مزمن من كتر الخبط و ال اه الى بصرخها طول اليوم

التلت التانى من اليوم بحاول أخفف من معاناة التلت الأول
أمشى فى الشوارع أصرخ ... أشتم .... العن و أسب
اسب الجهل اللى بمسكه كل يوم
اللى بتكلم معاه كل يوم
اللى بقعد جانبه كل يوم
يلعن أبو مجانية التعليم اللى خلتنى أكلم نفسى فى الشارع
اللى خلتنى اقعد على الكرسى ده و أكتب الكلام ده
و برضه أفضل مكمل فى الشارع أصرخ ... أشتم .... العن و أسب
أسب للأفيون اللى جعل الناس كلها تصرخ و تقول : سيدنا الشيخ قال ... سيدنا الشيخ عمل
و أنا لوحدى واقف هنا و بصرخ : و فين الضمير يا كفرة ... فين أنتم ... فين عقلكم وقلبكم يا بشر
مين الى عين الشيخ ده ضمير ليكم
و مين اللى خلاه ربنا
أعقلوا الكلام و فكروا
بأسم جميع الكتب السماوبة
بأسم جميع الأديان
بأسم جميع الثقافات
الـــتـــفـــــكــــيــــر مـــــــش حــــــــــرام
و يلعن اى شخص على الأرض يقول كده
لكن المشكلة أن التكفير أسهل بكتير من التفكير

التلت التالت من اليوم بنزل فيه وسط البلد
ناس أعرفهم بأقعد معاهم
و كلنا مقتنعين بنفس الحاجة
الجهل جعلنا نذهب أبعد من الشموس السبع
ايوا كلنا مختلفين وكل واحد عنده نظرة مختلفه لكن مش بعيده عن بعض
شعب وسط البلد بيتقسم لمجموعات كتيرة
فنانين ... مثقفين ... مفكرين ... مدعيين ... شيوعيين ... ملحدين ... حشاشين ... صعاليك
و كل مجموعة فيها الكويس و الوحش
والكل بالنسبة ليه وسط البلد مكان مهم
المكان الوحيد اللى ممكن تقول اللى أنت عايزه من غير ما حد يبصلك و يقول أنت كافر
مكان ممكن أى واحده عايزه تقعد على قهوة بلدى تشرب اللى هى عايزاه من غير ما يتبصلها بصة كدة ولا كده
و فى نفس الوقت تجمع كبير لناس كتيرة بتدور على فرصة للأبداع
مكان مهم لي فى تركيب اليوم اللى بعيشه
هناك بقعد مع اللى أعرفهم و أضمنهم نشوف ايه الحل للمأساة البشرية اللى أسمها مصر
طبعاً فى لحظة من اللحظات هم وصلوا للحل : خليها تولع مفيش فايدة
لكن أنا برضه مصمم انى الاقى حل
لغاية اللى حصل أنهاردة

شباب جامعى بيعمل قنابل و يفرقع السياح
أنا مش مستغرب ان المنفذ شباب جامعى
دول ناس بيتعملهم غسيل مخ من أول لحظة بيتخلوا فيها باب الكلية
انا عايز أعرف ايه احساسه دلوقت و هو بيطالب بالقصور اللى المفروض بتاعته فى الجنة وهما بيبصولوا بأستغراب - المسئولين عن الجنة - و بيقولو ليه النمرة غلط

مين السبب؟
أنا ولا أنت ولا هما؟

فيه دين بيقول كده؟
طيب لو مفيش ليه الناس بتعمل كده
المزيكا حرام
الأختلاط حرام
التفكير حرام
كل حاجة حرام
ليه؟ ... أزاى؟

احد المواقف اللى حصلت من أربع أو خمس أيام كان فى الكلية عندى لما مهندسين المستقبل فكروا أنهم يوزعوا سديهات حفلة التخرج على الدفعة
فطلع أحد المؤمنين - كتر الله من امثاله من أجل رفعة الوطن - و قال لأ مش هينفع نوزع الحفلة كدةاحنا نعمل نوعين من السديهات للمهندسين واحدة للرجالة و التانية للسيدات
فواحد راح قاله أزاى يا سيدنا الشيخ؟
قال : أحنا نعمل نسخة رجالى نشيل منها كل الكادرات اللى ظهر فيها اى امرأة عشان متبقاش معصية للرجال
ونسخة العكس للسيدات عشان متبقاش معصية ليهم
و وافق الجميع على كلام الشيخ لأنهم هكذا أرضوا الله عز و جل
طيب أزاى؟
ازاى ارضوا ربنا .... حد يقنعنى
ومحدش رد
و قالوا سيبوكوم منه ... ده مش فاهم حاجة

أنا عايز حقى ... عايز وطن حر ... وطن لا يتحكم فيه الدين
أو اعيش فى العصر اللى كانوا بيقولوا فيه الدين لالله و الوطن للجميع
أو فيزا لأى بلد أوروبى
أو أريقوا دمى و خلصونى

عمار يا بلد الأشراف
اى يوم شفت إنسان خردة للبيع ماشى فى شوارع المحروسة بيكلم نفسه و بيسب و بيلعن عشان مش لاقى حاجة تانية تحل الموقف
تبقى تيجى تسلم عليا
أو حتى تمشى جمبى و تصرخ معايا
حـــــــــــرام .... كــــــفـــــــــايــــــــة