دردشة

كلام مهم بس مش ضرورى

موقف 1
متجيش يا بيه تقول لسعادتى: و أنت ايه دخلك أو ملكش دعوة يا برنس أو متتحشرش فى الى مالكش فيه
ليه؟
علشان طول ما أحنا الأتنين بنمشى على نفس الأرض و بنشم نفس الهوا و بنشرب نفس الميا
و طول ما وشك السمح بيبقى حاجة أساسية بتفرج عليها كل يوم يبقى أنا أسف انى أقول الكلام ده : يلعن أبو كده أنا حر اقول اللى أنا شايفه

الواد فاكر نفسه هو القاضى و فاكر ان كلامه قانون يطبق على رقاب الجميع فكان لازم أفهمه بطريقة متحضره أن كلامه لا يطبق على رقبة سيادتى فكالعادة بما انى بفهمه بطريقة محترمة ... مفهمش حاجة
لكن الطريقة الغير محترمة جابت نتيجة

موقف 2
أنت بقيت شرير جداً على فكرة -
بعد تفكير قصير
ايوا أنا ملاحظ كده بس مش عارف ليه -
صدقنى معرفش أنا كمان ليه ... بس ده كويس على فكرة -
كويس؟ .... أيه الكلام ده؟ .... أزاى كويس؟ -
ايوا كويس الناس دلوقت بتخاف منك ... أنت شفت أزاى سواق التاكسى لما قال الفلوس مش -
كفاية و أنت كلمته كش و مشى
ايوا لكن ده مش عشان أنا شرير .... ده عشان أخد حسابه مظبوط -
بقولك ايه متلفش و تدور انت بقيت شرير و الناس بتخاف منك ... علمنى ابقى شرير -
انت عبيط؟ -

موقف 3
ف: أحنا نتقابل يوم الأربع عشان المشروع
أنا: مبلاش الأربع و نخليها على الصيف
الكل: ايه الكلام الفاضى ده لأ هنتقابل يوم الأربع
الكل روح
يوم الأربع الساعة 11 الصبح
ع: الو ... مش هنتقابل أنهاردة عند ف
أنا: أمال هنتقابل فين؟
ع: مش هنتقابل خالص أصل حصلتله حالة وفاة
أنا: نعم؟ ... انا قلت بلاش نتقابل الأربع شفت لو كنا أجلناها مكنش حد مات

موقف 4

المكان : قهوة بلدى
الساعة :7:30 مساء
يا زعيم واحد قهوة سادة -

طيب -
بعد ربع ساعة
يا أستاذ أنا طلبت قهوة سادة من ربع ساعة هى فين -
هى لسه مجتلكش؟ -
لأ -
طيب ثوانى -
بعد عشر دقائق
يا زعيم فين القهوة السادة -
يا عم طيب هو أنا شغال عندك -
نعم؟ -
زباين مزعجة ... أحنا مش شغالين عند الى جبوكم -

موقف 5
سائق ميكروباص عارض العربية للبيع كاتب عليها
السيارة للبيع عشان تستريحوا
المخابرة مع السائق