ماذا يحدث فى البلد حالياً؟

لا أعلم ماذا يحدث اليوم بالذات فى البلد لقد ذهبت صباحاً كالعادة إلى الكلية - كلية الهندسة الموجودة فى الجهة المقابلة للحرم بجانب حديقة الحيوان - و كانت مظاهرة قائمة أمام الحرم الجامعى من الخارج لم أميز ما يهتفون به ولم أستطع تمييز المكتوب على اللافتات المحمولة لذا فتوجهت إلى باب الكلية على أمل بأن القى من يعرف أى شىء و قبل دخولى و جدت أحدهم ينادى : كابتن
نظرت إلى من ينادى كان شخص يرتدى ملابس مدنية ولكن حجمه ضخم بالنسبة إلى إنسان مدنى فأستنتجت انه من عائلة الأمن المركزى المنتشر فى كل مكان فأجبته : أنا؟
- رايح فين يا كابتن؟
- داخل الكلية
- وريلى البطاقة
فأخرجت له كارنيه الكلية دون أن ينظر له قال : لأ أنا عايز البطاقة يا كابتن مش الكارنيه
فأخرجت له البطاقة و بعد أن قرأ بياناتى

- أنت مسيحى يا بشمهندس
- أيوا
- أمال ليه مطول دقنك كده؟ .... أتفضل
و أعطانى الكارنيه و البطاقة
منذ خمس سنوات أخرجت كارنيه الكلية 4 مرات فقط لأريه لحارس الأمن و اليوم كانت خامس مرة ... حاجة غريبة
بعد أنتهائى من تسليم بعض الأوراق المطلوب تسليمها ذهبت لأبحث عن اى شخص أعرفه لأستعلم عن سبب المظاهرة لكنى لم أجد اى شخص .... حاجة غريبة
فقررت أن أخرج لأعرف سبب المظاهرة وحدى
وقفت على الرصيف المقابل للمظاهرة لكن الهتافات كانت غير واضحة أخذت أنظر بتمعن لقرائة المكتوب على اللافتات و أخذت أركز فى محاولة بائسة لتفسير اى شىء - نظرى ضعيف جداً - فقطع تركيزى يد ضخمة تُضع على كتفى مع صوت يقول أطلع قدام يا كابتن نظرت فرأيت شخص يرتدى أسود و يحمل جهاز لاسلكى - أمن مركزى - فذهبت فى الأتجاه الأجبارى الذى جعلوا الجميع يسيروا فيه لسبب على حد قولهم : دية مظاهرة هتتفرجوا على ايه؟

فأكملت طريقى بعد أن يأست من معرفة سبب المظاهرة
حاولت أن أوقف اى تاكسى و بعد معاناة وقف أحدهم

- العجوزة
- هى المظاهرة دية بتاعت ايه؟

- علمى علمك
- همم .... عايز تروح فين؟
- العجوزة
- لأ مش طريقى
و سار مبتعداً ... أخذت اتسائل هل رفض توصيلى بسبب جهلى عن سبب المظاهرة ... جايز ... حاجة غريبة
فقررت أن أذهب إلى العجوزة سيراً على الأقدام و أنا أقول فى سرى غصب عنكم هروح بتنا
بعد مسيرة قصيرة وصلت إلى ميدان سليمان جوهر فى الدقى فأتصلت بصديق يسكن هناك و أنتظرته على المقهى الموجود أمام بيته و بعد أن جاء جلسنا بعض الوقت جائتنى مكالمة من صديق لى فى الجامعة
- الوو شوفت ولاد ال....عملوا ايه؟

أعتقدته يتحدث عن المظاهرة فأجبته بسذاجه : أيه كسروا العربيات؟
- عربيات ايه؟ ... الجدول أتغير مرة تانية
كان يتحدث عن جدول أمتحانات منتصف نصف العام * الذى كان القسم يغيره كل يوم على مدار الأربع أيام السابقة كذا مرة فى اليوم
- يعنى بقى ايه دلوقت؟
- لسه محدش عارف
- طيب لما تعرف عرفنى
- أنت هتروح بيتكوا؟
- أروح بيتنا علشان أذاكر أول مادة فى الجدول الى محدش يعرفها؟ ... لأ أنا رايح على الحرية فى وسط البلد
- طيب سلام
- سلام
فتوجهت إلى محطة مترو البحوث لأذهب إلى التحرير
و عند وصولى وخروجى من باب المترو إلى ميدان التحرير, لم أعلم ماذا يحدث, أعداد مهولة من مرتدى الزى الأسود و العربيات الخضراء الضخمة المحملة بألاف من أفراد الأمن المركزى .... هو فى ايه بالظبط
أخذت أنظر حولى لعلى أرى اى هتافات أو مظاهرات و لكن لا شىء كل هذا و مازلت على سلم الخروج و نظرات الدهشة على وجهى تغرى اى أحد ان يسئلنى على ما أفعله و هذا ما حدث
جاء ضابط إلى و أخذ ينظر لى بتمعن ثم كالعادة

- بطاقتك
فأخرجت له البطاقة أخذ يراجع البيانات و ينظر لى ثم
- معاك أثبات شخصية تانى؟
فأخرجت له كارنيه الكلية - أعتقد أن هذه أول فائدة فعلية له منذ خمس سنوات - فأرتسمت علامات الخيبة على وجه وأعطانى البطاقة والكارنيه
- أتفضل أمشى يا بشمهندس من هنا الوقوف هنا مش مستحب ... و خفف دقنك شوية أنت لسه شباب على الكلام ده
فهمهمت بكلام لم أفهمه أنا شخصياً وأتجهت إلى مقهى الحرية و فى داخلى سؤال يتردد هو فى ايه, هو مفيش غيرى فى البلد دية معاه بطاقه؟ .... حاجة غريبة

طبعاً أستنتجت كالعادة - أصلى ذكى شويتين - بعض النقاط
1 - فى حاجة غريبة بتحصل فى البلد

2 - الحكومة مش عجباها دقنى
3 - شكلى مغرى انهم يوقفونى ... يمكن علشان الدقن
4 - لازم أحلق دقنى فى أقرب وقت
و بعد تفكير أعمق صرفت النظر على النقطة الرابعة ... أنا مش بحب أحلق لكن أحب أعرف
ماذا يحدث فى البلد حالياً؟

* Mid-Term Exams

Comments

R said…
أنا أنصحك تعيد نظر في نقطة رقم 4.
يعني أقصد تعيد نظر في صرف النظر.
مش بعيد سوّاق التاكسي يكون مخبر :)
ـ
أنا أقول لك. مظاهرة الجامعة نظمها شباب الإسلاميين بهدف إلغاء حالة الطوارئ، وتغيير الدستور كله، ومعه قوانين الممارسة السياسية، وإجراء انتخابات نيابية. العسكر في ميدان التحرير طفشوا مظاهرة الحركة المصرية من أجل التغيير التي لها نفس المطالب بالضبط، غالبا لأنهم (أي أعضاء الحركة) قليلوا الأدب.
hratib said…
very funny. not ha ha funny though.
رجعت بيتنا من حوالى نص ساعة و عرفت مين كان بيعمل ايه أنهاردة فى الجامعة / ميدان التحرير من الناس الى كانوا فى قالب الأحداث .... شكراً لصاحب الأشجار على التفاصيل بتاعت منظمى المظهرات لكن جيت متأخر

اللى أنا عارفه ان مظاهرة الأخوان أو الشباب الإسلاميين مش بتنادى بتغيير الدستور كله لكن هى بتنادى أن المادة67
يعاد صياغتها - و هما ما أعلانوش الصياغة الجديدة لكن قدموا ورق للجهات المختصة بهذه الصياغة - بجانب كل الى أنت قلته و طبعاً قيام الدولة الأسلامية
على لسان واحد من الى كانوا فى المظاهرة
Hellme said…
Mate7la2 da2nak ya akhee :)

We ba3dein ah, mafeesh gheirak 3ando beta2a. Ma7adesh 2alak wala 2eh?
wa7ed mn masr said…
أنا كمان لما بيبقى عندى أجازة ماباحبش أحلق لكن فى مطار دولة عربية شقيقة من أصحاب أمريكا أخدت وقت طويل علشان أقنع ظابط الجوازات إنى أنا اللى في الباسبور و إن الدقن دى حاجة بتروح وتيجي ,فخلي بالك لان الظابط الجاى هيقول إنك مزور بطاقة واحد مسيحى...
ألِف said…
حاجة تفقع القرد!

Popular Posts